رسالة الى اقرب صديق لك

ياصاحبي لاطال بك ليل الغمـوض اللـي سريـت
وتاهت بك الخطـوة مـع ذاك الطريـق الملتـوي
ليمـن وصلـت لنقطـةٍ تحتـار فيهـا مادريـت
انته على درب الخطا والا علـى الـدرب السـوي
لا بارت الخوه وضاعـت هقوتـك فيمـن هقيـت
وبانت ملامح من تظنْ انْـه لـك احـزام وخـوي
وانهد قُدْم اعيونك اصروح الطمـوح اللـي بنيـت
اللـي تحسبنْهـا ليـا جـار الزمـن مابتـهـوي
لاافلست من جمع السنين الي جمعـت ولاخذيـت
من رحلتـك غيـر القهـر والانهـزام المعنـوي
وباقي جروحٍ مـمشاويـر الحيـاة ومـا مشيـت
ولون المشيب اللي كسا وجه الشبـاب المرتـوي
ليمن وقفت تراجع اوراق الزمـان اللـي قضيـت
واونست في كبدك من احوالك مثـل لـذع الكـوي
في وقتها تعرف وش الي مـن صداقاتـك جنيـت
وترجع تمنَى لـو قضيـت العمـر كلـه منـزوي
لكـن هنـا ماينفعـك ياصاحبـي قولـة يـليـت
ماراح راح وما انتهى من صفحـة ايامـك طُـوي
ومن عاش ماعنده هدف ماذاع له فـالارض صيت
ومن رام شي من العلا ما راح عمـره فوضـوي
ياصاحبي اليا انتهيت مـن الطريـق الـي بديـت
وادركت بانك صرت في وضعٍ خطيـر ومأسـوي
ماهوب عيب انك تقـول انـي تعثـرت وخطيـت
الكـل يخطـي وابـن أدم مـن طبيعتْـه ايغـوي
الكارثـه وام المصايـب والبـلا لامـن دريــت
انك على درب الخطا وتقـول انـا دربـي سـوي